Павіншаваць гімназістаў і іх настаўнікаў прыйшлі старшыня райвыканкама Дзмітрый Калееў, намеснік начальніка аддзела адукацыі, спорту і турызму Валянціна Малашонак, ветэран 57-ай марской ракетаноснай авіяцыйнай дывізіі Аляксандр Баранаў, загадчыца гарадской бібліятэкай-філіялам № 49 Наталля Сляпцова.

Госці пажадалі адзінаццацікласнікам паспяхова закончыць апошні навучальны год, першакласнікам і іх бацькам — набрацца цярпення, бо наперадзе чакае нямала выпрабаванняў, астатнім — працягваць свой шлях па краіне ведаў.

Дзмітрый Міхайлавіч, акрамя віншаванняў, падараваў гімназіі сертыфікат на набыццё 2 камплектаў вучнёўскай мэблі.

А інспектар ІСН Быхаўскага РАУС лейтынант міліцыі Анастасія Баравік урычыла вучаніцы 9 класа Яне Цыганковай першы важны дакумент у жыцці— пашпарт.

Дырэктар гімназіі Людміла Яршова падзякавала вучняў за значныя поспехі ў разнастайных конкурсах, алімпіядах, за ўдзел у грамадскім жыцці. Сярод шматлікіх узнагарод атрымаў сваю і вучань 8 класа Павел Новікаў, які заняў 1 месца ў абласным конкурсе творчых работ «Мой ласкавы і пяшчотны звер», прысвечаным сусветнаму дню кошкі ў намінацыі «Верш».

Падзяку ад філіяла «Макранскі» ААТ «Быхаўскі КАСЗ» атрымалі вучаніцы 10 класа Вікторыя Чорная і Алена Левычанкова, якія працавалі там у час летніх канікул, за добрасумленныя адносіны да працы, добрую дысцыпліну.

У гэтым годзе ў гіманзіі будуць вучыцца 585 хлопцаў і дзяўчат, а для 71 першакласніка пачнецца разнастайнае, цікавае школьнае жыццё. А вось вучні трох адзіннаццатых класаў у апошні раз прыйшлі на Дзень ведаў.

Галоўным у гэтым годзе для іх стане падрыхтоўка да паступлення ў вышэйшыя і сярэднія навучальныя ўстановы.

Папаўненне адбылося не толькі сярод вучняў, але і ў настаўніцкім саставе. Сваю прафесійную дзейнасць у гімназіі пачнуць маладыя спецыялісты — настаўніца англійскай мовы Дар’я Іванькова і настаўнік грамадазнаўства Павел Сініла. Прыйшлі працаваць у гімназію вопытныя настаўнікі: выкладаць матэматыку будзе Святлана Левіцкая, хімію — Наталля Семчанка, рускі язык і літаратуру — Людміла Пушыстава.

Права даць першы званок атрымалі вучаніца 1 класа Вікторыя Цыпорына і вучань 11 класа Аляксандр Пронін.

У сяброўскую ліцейскую сям’ю прынялі ў гэты дзень 54 дзесяцікласніка, а выпускнікамі у гэтым годзе стануць 60 ліцэістаў.

З пажаданнямі добрых адзнак, поспехаў, творчых знаходак выступіў ветэран 57 МРАД Аляксандр Баранаў.

Дырэктар СЗАО «Агралінк» Аляксандр Захарэвіч павіншаваў хлопцаў і дзяўчат з Днем ведаў, а напярэдадні ён аказаў спонсарскую дапамогу пры падрыхтоўцы установы да новага навучальнага года.

На ўрачыстай лінейке ўручылі Дыпломы вучаніцам 11 класа Яне Двараковай і Дар’е Ус за ўдзел у рэспубліканскім конкурсе, прысвечаным 70-годдзю вызвалення Рэспублікі Беларусь ад нямецка-фашысцкіх захопнікаў у намінацыях «Дастойная спроба даследавання тэмы» і «Лепшае эсэ».

Вучаніца 11 класа Аня Мосінава адзначана Падзякай за ўдзел у міжнароднай канферэнцыі «Маладыя таленты — 2014».

Важным днём стала 1 верасня і для маладой настаўніцы хіміі Вольгі Казіміравай, якая прыйшла ў ліцэй пасля заканчэння МДУ імя А. Куляшова.

Мы нават не чакалі ўбачыць такую незвычайную прыгажосць. З левага боку пры падыходзе да ўстановы адукацыі «Грудзінаўскі ВПК дзіцячы сад-сярэдняя школа» бачылася на фоне розных кветак прыгожая альтанка, а з правага — узвышаліся туі, радавалі вока клумбы, яблыні з сакавітымі пладамі. Тут 1 верасня і намячалі правесці ўрачыстую школьную лінейку, але зацягнутае хмарамі неба ўнесла свае карэктывы ў планы адміністрацыі.

У апошні момант гэтую падзею вырашылі ладзіць у актавай зале і правільна зрабілі. За некалькі хвілін да пачатку сыпануў спорны дождж, які не сціхаў потым нават пасля яе заканчэння. А ішла ўрачыстасць недзе каля гадзіны. І на гэты раз яна была некалькі незвычайная, у чым пазней пераканаліся вучні, іх бацькі, настаўнікі, якіх з пачаткам новага навучальнага года вітаў дырэктар установы адукацыі Сяргей Ігнацьеў. Ён таксама паведаміў, што па выніках раённага агляду-конкурсу «Лепшы школьны двор» іх школа заняла першае месца і займела грамату аддзела адукацыі, спорту і турызму райвыканкама сумесна з райкамам прафсаюза работнікаў адукацыі і навукі, да якой прыкладвалася адпаведнае грашовае ўзнагароджванне.

На сённяшні дзень у школу прыйшлі 76 навучэнцаў і 25 выхаванцаў дзіцячага садка. Першакласнікаў усяго двое. Ім загадчыца метадычным кабінетам аддзела адукацыі, спорту і турызму райвыканкама Наталля Брызгалава і ўручыла флікеры па рэспубліканскай акцыі «Першакласнік, стань прыкметным!», а таксама кішэнныя кніжачкі-памяткі «Што рабіць у надзвычайнай сітуацыі», выдадзеныя МНС.

З пачаткам новага навучальнага года прысутных вітаюць старшыня раённай арганізацыі ГА «Беларускі саюз афіцэраў» Віктар Прышчэпа, галоўны рэдактар раённай газеты «Маяк Прыдняпроўя» Мікола Леўчанка, былы ваенаслужачы 57-й МРАД Васіль Стараселец.

Падпалкоўнік марской авіяцыі ў адстаўцы, былы першы намеснік камандзіра 170-га авіяпалка Віктар Прышчэпа ўручыў кіраўніку школы кнігу «Крылатая гвардия», а яе аўтар Мікола Леўчанка расказаў коратка, як стваралася гэтая кніга, у якой распавядаецца пра баявы шлях ужо не існуючай 57-й марской ракетаноснай авіяцыйнай дывизіі, 32 афіцэры якой сталі Героямі і двойчы Героямі Савецкага Саюза, а двое — Героямі Расійскай Федэрацыі.

Маючае патрыятычную накіраванасць свята першага званка суправаджалася не толькі віншаваннямі, а і песнямі, прысвечанымі школе, якая сёлета папоўнілася двума маладымі спецыялістамі — настаўніцаю беларускай мовы і літаратуры Вольгаю Крапіўнаю, настаўнікам фізікі і матэматыкі Станіславам Гаўрюлюком. Праўда, першакласнікаў толькі двое, але ў наступным 2015/2016 навучальным годзе іх будзе ўжо 10, а гэта акалічнасць сведчыць сама за сябе. Вучыць іх грамаце будзе вопытная настаўніца Наталля Уладзіміраўна Корабава. Выпускнікоў жа сёлета ўсяго 7 хлопчыкаў і дзяўчынак, але ўся ўвага была скіравана на першакласнікаў, якім ад імя лідара нашай дзяржавы ўручылі да таго ж кніжкі «Беларусь — мая Радзіма».

Завяршыўся Дзень ведаў урокам міру. Навучэнцы малодшых класаў селі за парты, а старшакласнікі з некаторымі педагогамі, бацькамі паглядзелі дакументальны відэафільм «Неба выбрала нас» аб лётчыках 57-й МРАД. Гледачам рознага ўзросту цікава было ўбачыць тагачасныя баявыя будні авіяцыйнай дывізіі, пачуць што кожны яе самалёт, а гэта ТУ-22М2, разам з ракетамі важыў недзе каля 120 тон і браў у свае бакі паліва цэлую чыгуначную цыстэрну ў межах 60 тон. Такія вось баявыя паветраныя караблі базіраваліся некалі ў Быхаве, абаранялі мірнае неба не толькі Беларусі, а і заходняй часткі СССР. Такі вось кароткі экскурс у гісторыю.

Пасля Грудзінаўкі былыя марскія авіятары Віктар Прышчэпа і Васіль Стараселец наведалі ДУА «Быхаўскі сацыяльна-педагагічны цэнтр» (ніжні здымак), які месціцца асобна ў будынку СШ № 3 г. Быхава, сустрэліся з дзецьмі і выхавацелямі. Яны прынеслі ім салодкія падарункі — два тарты.