Выконваючы абавязкі галоўнага ўрача раённага цэнтра гігіены і эпідэміялогіі Надзея Атаева адказвае на пытанне станоўча. Гігіеністы праверылі ўсе ўстановы адукацыі Быхаўшчыны. І ў 100% выпадках вынікі лабараторных даследванняў санітарнага стану страваблокаў — на бяспечным узроўні. Адзначаюць спецыялісты і ўзмацненне кантролю за кулінарным працэсам на месцах. Атрымліваецца, што амаль кожны з дырэктараў школ ледзь не асабіста сочыць за «смачным» пытаннем — ад прыёмкі прадуктаў да якаснага мыцця посуду ды пліт.

Занадта ўвагі? Ні ў якім разе, лічыць кіраўніцтва раёна. Пакуль увесь працэс не будзе максімальна удасканаленым, назіраць за ім будуць усебакова. Тым больш недахопы пакуль ёсць. Дагэтуль рэгіструюцца прыклады невыканання натуральных нормаў харчавання: замест «заяўленай» катлеты ў талерках аказваецца сасіска, а салат з капусты змяняецца на свежыя агуркі. На першы погляд, дробязі, але з іх і складаецца дакладнасць вітамінна-каларыйнага балансу.

Спецыялісты з розных галін — адукацыі, райспажыўтаварыства, урачы-гігіеністы — зыходзяцца ў адным меркаванні: парушэнне нормаў адбываецца з-за дысбалансу ў схеме «выдзеленыя грошы — напоўненасць талеркі». «Для выпраўлення дысбалансу вы і працуеце ў цеснай звязцы», — рэагуе на аргументы старшыня райвыканкама Сяргей Ігнаценка. — Упэўнены, што ёсць яшчэ рэзервы, каб зрабіць харчаванне больш танным, без шкоды для якасці". Пацвярджэнне гэтым словам — вынікі лістапада, калі сярэднее выкананне натуральных нормаў склала амаль 92%. І гэта ў параўнанні з сямідзесяціпрацэнтным паказчыкам верасня.

Дарэчы, яшчэ адным праблемным момантам з’яўляецца недахоп кулінарных кадраў. На сёняшні дзень няма повараў у школах Следзюкоў, Новага Быхава, Лудчыц. Старшыня дае даручэнне максімальна хутка вырашыць пытанне. Таксама, як і адрамантаваць памяшканне сталовай у Абідавічах — на столі тут падчас ападкаў збіраецца вільгаць.

...Зацікаўленыя службы збіраліся ўчора ізноў, ужо больш цесным колам. Прынялі шэраг рабочых рашэнняў, якія пойдуць на карысць школьнаму харчаванню. Тым часам, пакуль у большасці школ краіны, яго кошт павялічыўся, у Быхаўскім раёне школьнікі па-ранейшаму ядуць бясплатна.

Уладзіслаў ГРЫБАНАЎ,
Алеся МУХАЧОВА (фота)