30 сакавіка ў Магілёве прайшоў першы этап абласнога конкурсу беларускага народнага гумару «Гумар і жарты Магілёўшчыны».
Конкурс праходзіў на базе арганізатараў — установы культуры «Магілёўскі абласны метадычны цэнтр народнай творчасці і культурна-асветнай работы». Ён праводзіцца ў мэтах падтрымкі, далейшага развіцця цікавасці да беларускага народнага гумару і сатыры, папулярызацыі народнай творчасці.
Права агучыць свае фірменныя жарты ў першым этапе атрымалі 59 удзельнікаў. Выступоўцаў чакалі дзве намінацыі: гумарыстычны нумар (сцэнкі, анекдоты, апавяданні, фельетоны, традыцыйны СТЭМ, маналог, пародыі, мініяцюры, дыялогі, байкі) і разнажанравыя жарты (песні-пародыі, жартоўныя песні, куплеты, прыпеўкі, галасавыя пародыі, жартоўны танец, танцавальныя замалёўкі).
Быхаўскі раён на конкурсе прадставілі народны фальклорны ансамбль «Багатуха» Быхаўскага РЦК. У выкананні калектыва прагучалі жартоўныя прыпеўкі «Як была я на вяселлі». Загадчык філіяла Ніканавіцкі СК Галіна Асіпёна прачытала гумарэску, а культарганізатар філіяла Вараніноўскі СДК Тамара Бігмаева выканала прыпеўкі.
Выступленні ўдзельнікаў ацэньваліся па крытэрыях: артыстызм; актуальнасць жартаў; музычнае афармленне; сцэнічная культура і выканаўчае майстэрства; мастацка-эстэтычны і сатырыка-гумарыстычны ўзровень рэпертуару; выкарыстанне сучаснага і традыцыйнага гумарыстычнага фальклору.
Другі заключны этап адбудзецца ў рамках абласнога фестывалю-кірмашу працаўнікоў вёскі «Дажынкі-2023» у г.п.Хоцімску. Усе ўдзельнікі конкурсу па выніку конкурсу ўзнагароджваюцца дыпломамі ўдзельніка, пераможцы конкурсу ўзнагароджваюцца дыпломамі I, II, III ступені ў кожнай катэгорыі і намінацыі.
Святлана Саламевіч, загадчык метадычнага аддзела
ДУК «Цэнтралізаваная клубная сістэма Быхаўскага раёна»